महाज्योती परीक्षा रद्द, आंबेगाव आणि नांदेड केंद्रांवरील विद्यार्थ्यांची होणार फेरपरीक्षा

पुण्यातील आंबेगाव केंद्रावर आयोजित महाज्योतीची आजची परीक्षा तांत्रिक अडचणींमुळे रद्द करण्यात आली आहे. आंबेगाव येथील परीक्षा केंद्रावर संगणक उपलब्ध नसल्याने ही परीक्षा स्थगित करण्याचा निर्णय घेण्यात आला. महाज्योतीचे व्यवस्थापकीय संचालक मिलिंद नारिंगे यांनी दिलेल्या माहितीनुसार, ही तांत्रिक अडचण लक्षात आल्यानंतर अहवाल मागवण्यात आला आहे.

या अचानक रद्द झालेल्या परीक्षेमुळे आंबेगाव आणि नांदेड केंद्रावरील सुमारे ३०० विद्यार्थ्यांना फटका बसला आहे. या सर्व विद्यार्थ्यांची परीक्षा पुन्हा नव्याने घेतली जाणार असल्याचे नारिंगे यांनी स्पष्ट केले. लवकरच नवीन तारीख आणि वेळ विद्यार्थ्यांना कळवण्यात येईल. तसेच, नवीन परीक्षा केंद्रे तातडीने निश्चित केली जात आहेत, जेणेकरून विद्यार्थ्यांच्या सोयीनुसार ती उपलब्ध होतील. या प्रकरणाची सखोल चौकशी करण्यात येत असून, संबंधित परीक्षा केंद्र, निरीक्षक आणि एजन्सीकडून अहवाल मागवण्यात आला आहे. दोषी आढळल्यास कारवाई केली जाईल, असेही महाज्योती प्रशासनाने सांगितले आहे.