Mumbai CNG Cut : सीएनजी गॅस पाईपलाईनमध्ये बिघाड, अनेक पंपांवर ‘CNG बंद’ बोर्ड, मुंबईत कुठं काय परिस्थिती?

मुंबई, ठाणे आणि नवी मुंबई येथे सीएनजी गॅस पाईपलाईनमध्ये अचानक बिघाड झाल्याने सीएनजीवर चालणाऱ्या वाहनांना इंधनाच्या समस्येचा सामना करावा लागत आहे. अनेक पंपांवर सीएनजी बंद असे फलक लावण्यात आले आहेत, ज्यामुळे वाहनचालक आणि प्रवाशांची गैरसोय होत आहे. ऑटो, टॅक्सी चालक यामुळे त्रस्त आहेत, तर प्रवाशांना बससाठी लांबच लांब रांगा लावाव्या लागत आहेत. हा बिघाड झाल्याने गेल्या तीन दिवसांपासून सीएनजी पुरवठा विस्कळीत झाला आहे.

महानगरातील सार्वजनिक वाहतूक व्यवस्था, विशेषतः रिक्षा आणि टॅक्सी, सीएनजीअभावी रस्त्यावर उतरू शकलेल्या नाहीत. महानगर गॅस लिमिटेड कंपनीने दिलेल्या निवेदनानुसार, पाईपलाईन दुरुस्तीचे काम वेगाने सुरू असून, सीएनजी सेवा लवकरच पूर्ववत होईल अशी अपेक्षा आहे. याचा घरगुती गॅस पुरवठ्यावर परिणाम होणार नसल्याचे कंपनीने स्पष्ट केले आहे.