Marathi Schools : तब्बल 600 मराठी शाळांना थेट कुलूप? शिक्षण विभागाच्या निर्णयानं मोठी नाराजी; नेमकं काय घडतंय?

महाराष्ट्रातील सुमारे 600 मराठी माध्यमाच्या शाळा बंद होण्याच्या मार्गावर आहेत, अशी माहिती समोर आली आहे. शिक्षण विभागाने लागू केलेल्या शिक्षक समायोजन प्रक्रियेमुळे हे गंभीर संकट उभे राहिले आहे. या निर्णयामुळे 25 पेक्षा कमी विद्यार्थी असलेल्या शाळांना सर्वाधिक फटका बसण्याची भीती व्यक्त केली जात आहे. या प्रक्रियेच्या विरोधात शिक्षण मंडळाने आक्रमक भूमिका घेतली आहे. शिक्षण मंडळाच्या प्रतिनिधींनी मंत्री दादा भुसे यांची भेट घेऊन ही समायोजन प्रक्रिया तात्काळ स्थगित करण्याची मागणी केली आहे. जर 2025-26 पर्यंत ही प्रक्रिया थांबवली नाही, तर अनेक छोट्या शाळांचे अस्तित्व धोक्यात येईल, असे शिक्षण मंडळाचे म्हणणे आहे.

आमदार सचिन अहीर यांनी खाजगी शाळांना प्रोत्साहन दिले जात असल्याचा आरोप केला आहे. शाळा बंद झाल्यास विद्यार्थ्यांना लांबच्या शाळांमध्ये जावे लागेल, ज्यामुळे ग्रामीण भागातील शिक्षण व्यवस्थेवर गंभीर परिणाम होण्याची शक्यता आहे. महायुती सरकारच्या या निर्णयावर पालक, शिक्षक आणि शाळा व्यवस्थापनांनी तीव्र नाराजी व्यक्त केली आहे.