Maharashtra Assembly : विधानभवन लॉबीत आव्हाड-पडळकरांचे समर्थक राडा प्रकरणी विशेषाधिकार समितीचा अहवाल सादर

महाराष्ट्र विधानसभेत १७ जुलै २०२५ रोजी विधानभवन मुंबई येथील मुख्य पोर्चमध्ये झालेल्या धक्काबुक्की प्रकरणावर विशेषाधिकार समितीचा अहवाल सादर करण्यात आला. सन्माननीय सदस्य जितेंद्र आव्हाड यांचे अभ्यागत नितीन हिंदुराव देशमुख आणि गोपीचंद पडळकर यांचे अभ्यागत सर्जेराव बबन टकले यांच्यातील या घटनेने विधानसभेची प्रतिष्ठा मलीन झाल्याचे अहवालात म्हटले आहे. या प्रकरणाच्या चौकशीसाठी स्थापन केलेल्या समितीने १० बैठका घेऊन साक्षीदारांचे जबाब नोंदवले.

समितीने विधानभवनाच्या सुरक्षिततेबाबत अनेक महत्त्वपूर्ण शिफारसी केल्या आहेत. यात संसदेप्रमाणेच विधानमंडळाची सुरक्षा व्यवस्था निर्माण करणे, अभ्यागतांसाठी स्वतंत्र नियमावली तयार करणे, पोलीस डेटाबेसशी संलग्न स्वयंचलित पार्श्वभूमी तपासणी प्रणाली कार्यान्वित करणे यासारख्या उपायांचा समावेश आहे. तसेच, या गंभीर कृत्यासाठी नितीन हिंदुराव देशमुख आणि सर्जेराव बबन टकले यांना दोन दिवसांची दिवाणी कारावासाची शिक्षा आणि २०२९ पर्यंत विधानभवनाच्या परिसरात प्रवेशबंदीची शिफारस केली आहे.