हिवाळी अधिवेशनाच्या पार्श्वभूमीवर नागपूरात नेत्यांची बॅनरबाजी

महाराष्ट्राचे लक्ष लागून राहिलेल्या नागपूर हिवाळी अधिवेशनाची तयारी पूर्ण झाली आहे. नागपूर शहरात, विशेषतः एअरपोर्ट परिसरापासून अधिवेशन स्थळापर्यंत, प्रमुख नेत्यांच्या स्वागताचे मोठे बॅनर आणि होर्डिंग्ज लावण्यात आले आहेत. यामध्ये उपमुख्यमंत्री एकनाथ शिंदे आणि मुख्यमंत्री देवेंद्र फडणवीस यांचे बॅनर विशेषतः चर्चेचा विषय ठरले आहेत. एकनाथ शिंदे यांच्या स्वागताचे बॅनर रस्त्याच्या दुतर्फा मोठ्या प्रमाणात दिसत आहेत, तर देवेंद्र फडणवीस यांच्यासाठी “देवाभाऊ” असा आशय असलेले बॅनरही लक्ष वेधून घेत आहेत. अजित पवार यांचेही स्वागताचे बॅनर लावण्यात आले आहेत.

सध्या सुरू असलेल्या नगरपालिका आणि नगरपंचायत निवडणुकांच्या आचारसंहितेमुळे अधिवेशनावर काही प्रमाणात परिणाम जाणवणार आहे. सरकारला नवीन घोषणा करता येणार नाहीत, त्यामुळे पुरवणी मागण्या, शासकीय कामकाज आणि पूर्वनिश्चित कार्यक्रमांवरच भर दिला जाईल. दुसरीकडे, भाजप आणि शिंदेच्या शिवसेनेत दिसून आलेला विसंवाद विरोधक अधिवेशनात अधोरेखित करण्याच्या तयारीत आहेत. त्यामुळे सत्ताधारी पक्षावर दबाव वाढण्याची शक्यता वर्तवली जात आहे. नागपुरात थंडी वाढली असली तरी, राजकीय वातावरण तापण्याची शक्यता नाकारता येत नाही, ज्यामुळे हे अधिवेशन गाजण्याची चिन्हे आहेत.