Saamana : सत्ताधाऱ्यांची मनमानी अन् यंत्रणांचा उन्माद… बिनविरोध फार्स मग निवडणुका का? ‘सामना’तून टीकास्त्र

सामनाच्या अग्रलेखातून महाराष्ट्रातील सत्ताधाऱ्यांच्या कार्यपद्धतीवर तीव्र नाराजी व्यक्त करण्यात आली आहे. बिनविरोध फार्स मग निवडणुका घेता कशाला? असा थेट सवाल या अग्रलेखातून उपस्थित करण्यात आला आहे. सामनाने म्हटले आहे की, राज्यात सत्ताधाऱ्यांची मनमानी सुरू असून, यंत्रणांचा उन्माद टोकाला पोहोचला आहे. महाराष्ट्राच्या इतिहासात अशी परिस्थिती कधीच नव्हती, असेही यात अधोरेखित करण्यात आले आहे. निवडणुका लढण्यापूर्वीच जर विजय विकत घेतला जात असेल, तर निवडणूक आयोग बरखास्त करून निवडणुका घेऊच नयेत, अशी भूमिका सामनाने घेतली आहे.

अग्रलेखात नमूद केल्यानुसार, ७० जागांवर एकही मत पडले नसतानाही सत्ताधाऱ्यांनी निवडणुका जिंकल्या. भाजपने आणि त्यांच्या मित्रपक्षांनी लोकशाहीचे हे माफियाकरण केले आहे. जिथे मते चोरणे शक्य झाले नाही, तिथे दहशत आणि पैशांचा वापर करून विरोधी उमेदवारांना माघार घेण्यास भाग पाडल्याचा गंभीर आरोप सामनाच्या अग्रलेखात करण्यात आला आहे. ही परिस्थिती महाराष्ट्राच्या लोकशाहीसाठी चिंताजनक असल्याचे मत व्यक्त करण्यात आले आहे.