Devendra Fadnavis : दुष्काळग्रस्त महाराष्ट्रासाठी फडणवीसांची दिल्लीवारी; अमित शहांची भेट, केंद्राचं पथक 8 ऑक्टोबरपासून पाहणी करणार

मुख्यमंत्री देवेंद्र फडणवीस यांनी आज दिल्लीत केंद्रीय गृहमंत्री अमित शहा यांची भेट घेतली. या भेटीमध्ये त्यांनी महाराष्ट्रातील दुष्काळ परिस्थितीवर सविस्तर चर्चा केली. फडणवीसांनी दिलेल्या माहितीनुसार, अमित शहा यांनी महाराष्ट्राला जास्तीत जास्त मदत देण्याचे आश्वासन दिले आहे.

सद्यस्थितीत महाराष्ट्रातील जवळपास बत्तीस जिल्ह्यांमध्ये दुष्काळ मोठ्या प्रमाणात दिसून येत असून, ऐंशी टक्के तालुके दुष्काळाने पूर्णपणे प्रभावित आहेत. या गंभीर परिस्थितीवर केंद्र सरकारने विशेष लक्ष देऊन मदत करावी, अशी विनंती फडणवीसांनी शहा यांना केली. तसेच, राज्याकडून पाठवण्यात येणाऱ्या प्रस्तावावर तात्काळ केंद्रीय पथक पाठवण्याची मागणीही त्यांनी केली.

या भेटीनंतर फडणवीसांनी सांगितले की, केंद्र सरकारकडून एक पथक ८ ते ११ ऑक्टोबर दरम्यान महाराष्ट्राच्या विविध भागांमध्ये दुष्काळाची पाहणी करण्यासाठी येणार आहे. हे पथक राज्यातील परिस्थितीची जमीनीस्तरावर तपासणी करेल आणि आपला अहवाल एनडीआरएफला सादर करेल. या अहवालावर आणि राज्याने पाठवलेल्या प्रस्तावावर आधारित निर्णय एनडीआरएफकडून घेण्यात येईल. यामुळे दुष्काळग्रस्तांना वेगाने मदत मिळण्याची शक्यता आहे.