Mumbai High Court : सण-उत्सवात सार्वजनिक ठिकाणी फटाके फोडण्यास बंदी; ढोल-ताशांमधील टोलवाद्यांवरही कोर्टाचा दणका

मुंबई उच्च न्यायालयाने धार्मिक सण-उत्सव आणि मिरवणुकांमध्ये सार्वजनिक ठिकाणी फटाके फोडण्यास बंदी घातली आहे. तसेच, ध्वनी प्रदूषणाची मर्यादा ओलांडणाऱ्यांवर कठोर कारवाईचे आदेश दिले आहेत. ढोल-ताशांमधील टोलवाद्यांवरही उच्च न्यायालयाने बंदी घातली आहे. ध्वनी प्रदूषणाविरोधातील सुनावणीदरम्यान न्यायमूर्ती गिरीश कुलकर्णी आणि नीला गोखले यांच्या खंडपीठाने हे निर्देश दिले.

या निर्णयात न्यायालयाने अनेक महत्त्वाचे मुद्दे अधोरेखित केले. फटाके फोडणारे फक्त काही लोक असले तरी त्याचा त्रास अनेकांना होतो, असे न्यायालयाने नमूद केले. ध्वनी प्रदूषणाची मर्यादा ओलांडणाऱ्या उपकरणांची जप्ती करण्याचे आदेशही देण्यात आले. गणपती मंडप देखील शांतता क्षेत्रात मोडू शकतात का, असा सवाल न्यायालयाने विचारला. रुग्णालय आणि शाळांसारखी धार्मिक स्थळेही शांतता क्षेत्रात येतात, मग गणपती मंडप का नाही, असे न्यायालयाने म्हटले. रस्ते अडवणे, वाहतूक कोंडी करणे आणि वायू प्रदूषण करणे यामुळे सामान्य नागरिकांना होणाऱ्या त्रासावरही न्यायालयाने चिंता व्यक्त केली. सण-उत्सव जरूर साजरे करा, पण त्याची किंमत इतरांना चुकवावी लागू नये, असे महत्त्वाचे मत न्यायालयाने मांडले.