Nagpur MLC Election Result : नागपूर पदवीधर मतमोजणी सुरू; 84 टेबलवर 84 हजार मतांची मोजणी, भाजप-काँग्रेसमध्ये चुरस

महाराष्ट्र विधान परिषद निवडणुकीच्या नागपूर पदवीधर मतदारसंघातील मतमोजणी प्रक्रियेला दुपारी 12:30 वाजता सुरुवात झाली आहे. एकूण 1,65,541 मतांपैकी पहिल्या टप्प्यात 84 हजार मतांची मोजणी एकाच वेळी 84 टेबलवर सुरू झाली आहे. मतपत्रिकांचे 25-25 मतांचे गठ्ठे तयार करण्याचे काम पूर्ण झाले असून, एकूण 6,621 गठ्ठे तयार करण्यात आले आहेत.

प्रत्येक टेबलवर 1000 मतांची मोजणी केली जात आहे. मतमोजणी सुरू झाल्यानंतर दीड ते दोन तासांत, म्हणजेच दुपारी 2 वाजेपर्यंत, या निवडणुकीचा पहिला कल हाती येण्याची शक्यता आहे. नागपूर पदवीधर मतदारसंघात भाजपचे सुधाकर कोहळे आणि काँग्रेसचे अभिजित वंजारी यांच्यात मुख्य लढत आहे. ही निवडणूक भाजपसाठी अत्यंत प्रतिष्ठेची मानली जात असून, मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांनीही या प्रचारात सक्रिय सहभाग घेतला होता. पहिल्या कलातून विजयाचे चित्र स्पष्ट होण्याची शक्यता वर्तवली जात आहे.