पाऊस सरासरीपेक्षा कमी; शेतकऱ्यांसाठी रोहित पवारांचा आक्रमक पवित्रा, थेट…

महाराष्ट्रात यंदा ३५ टक्के पाऊस कमी झाला असून, राज्यातील ३५५ तालुक्यांपैकी २८० तालुक्यांमध्ये पाऊस सरासरीपेक्षा कमी झाला आहे. मराठवाड्यात ५० ते ५५ टक्के, तर विदर्भ, पश्चिम महाराष्ट्र आणि खानदेशातही अशीच परिस्थिती आहे. यामुळे शेतीचे मोठ्या प्रमाणात नुकसान झाले आहे. धाराशिव, बीड, लातूर, नांदेड यांसारख्या मराठवाड्यातील जिल्ह्यांमध्ये शेतकऱ्यांशी संवाद साधल्यानंतर रोहित पवार यांनी ही माहिती दिली. या कमी पावसामुळे शेतकऱ्यांच्या हातातून खरीप पिके पूर्णपणे गेली आहेत. खरीप पिकांचे नुकसान झाल्यामुळे रब्बी पिकांची लागवड करणेही शक्य होणार नाही, अशी स्थिती आहे. त्यामुळे शेतकऱ्यांना मोठा आर्थिक फटका बसणार आहे. या गंभीर परिस्थितीची दखल घेत आदरणीय पवार साहेबांनी मुख्यमंत्र्यांना पत्र लिहून वस्तुस्थितीची जाणीव करून दिली आहे.

रोहित पवार यांनी राज्य सरकारवर केवळ शब्दांचा खेळ करत असल्याची टीका केली आहे. ते म्हणाले की, या परिस्थितीमध्ये शेतकऱ्याला हेक्टरी ५० हजार रुपये मदत देणे आवश्यक आहे. तसेच, जनावरांसाठी चारा छावण्या तातडीने सुरू करण्याची गरज आहे. ही मागणी राज्यातील हजारो शेतकऱ्यांची आहे, असेही त्यांनी नमूद केले.