Mumbai Local Train Crowd : लोकलच्या गर्दीने घेतला जवानाचा बळी, धक्काबुक्की अन् थेट पडला रूळावर, नेमकं घडलं काय?

मुंबई लोकल ट्रेनमधील अफाट गर्दीने महाराष्ट्र सुरक्षा दलाच्या एका जवानाचा बळी घेतला आहे. गणेश जगदाळे असे या दुर्दैवी जवानाचे नाव आहे. शुक्रवारी सकाळी साडेआठ वाजण्याच्या सुमारास ही हृदयद्रावक घटना घडली. जगदाळे हे आपली ड्युटी संपवून दहिसर स्थानकातून दादरला जाण्यासाठी लोकल ट्रेनमध्ये चढले होते. मलाड आणि गोरेगाव स्थानकांदरम्यान झालेल्या प्रचंड धक्काबुक्कीमुळे ते लोकल ट्रेनमधून खाली रुळावर पडले आणि त्यांचा मृत्यू झाला.

मुंबईची जीवनवाहिनी मानल्या जाणाऱ्या लोकल ट्रेन्समध्ये दररोज लाखो प्रवासी जीवघेणा प्रवास करतात. अशा गर्दीमुळे घडलेल्या अपघातांची ही पहिलीच वेळ नाही, ज्यामुळे प्रवाशांच्या सुरक्षिततेचा प्रश्न पुन्हा एकदा ऐरणीवर आला आहे. महाराष्ट्र सुरक्षा दलाच्या एका जवानाचा गर्दीमुळे मृत्यू होणे, ही गंभीर बाब असून लोकल प्रवासातील धोक्यांवर या घटनेने पुन्हा प्रकाश टाकला आहे. प्रशासनाने या गंभीर समस्येकडे तातडीने लक्ष देऊन मुंबईकरांच्या सुरक्षित प्रवासासाठी ठोस उपाययोजना करणे गरजेचे आहे.