Winter Session 2025 : यंदा हिवाळी अधिवेशन फक्त एक आठवडा, तारीख समोर; रविवारीही कामकाज राहणार सुरू

महाराष्ट्र विधिमंडळाचे हिवाळी अधिवेशन 8 ते 14 डिसेंबर 2025 दरम्यान आयोजित करण्यात आले आहे. कामकाज सल्लागार समितीच्या बैठकीनंतर हा निर्णय घेण्यात आला असून, अधिवेशन फक्त सात दिवसांचे असणार आहे. विशेष म्हणजे, या कालावधीत रविवारी देखील अधिवेशनाचे कामकाज सुरू राहणार असल्याची माहिती आहे. या अल्पकालावधीच्या अधिवेशनात अनेक महत्त्वाचे मुद्दे गाजण्याची शक्यता आहे. अधिवेशनापूर्वीच राजकीय वर्तुळात अनेक घडामोडी घडताना दिसत आहेत.

राष्ट्रवादी काँग्रेसच्या खासदार सुप्रिया सुळे यांनी राज्य सरकारवर शेतकऱ्यांची फसवाफसवी करत असल्याचा गंभीर आरोप केला आहे. केंद्रीय कृषीमंत्र्यांनी अतिवृष्टीग्रस्त शेतकऱ्यांच्या मदतीबाबत राज्य सरकारकडून केंद्राला अद्याप कोणताही प्रस्ताव प्राप्त झाला नसल्याचे विधान केले होते. या विधानानंतर सुप्रिया सुळे यांनी सरकारवर टीका करत, शेतकऱ्यांसाठी वाटपाचे पैसे आले कुठून असा सवाल उपस्थित केला आहे. याशिवाय, सुप्रिया सुळे यांनी मुख्यमंत्री देवेंद्र फडणवीस यांना एक पत्र लिहिले आहे. या पत्रातून त्यांनी निवडणुकीच्या काळात झालेल्या हाणामारीसंदर्भात तातडीने कारवाई करण्याची मागणी केली आहे. महाराष्ट्राच्या राजकारणाची पातळी घसरत असल्याबद्दल त्यांनी चिंता व्यक्त केली आहे.