परत येईन की नाही, माहीत नाही; मी… मनोज जरांगे अचानक असं का म्हणाले?

मराठा आरक्षणासाठी मनोज जरांगे पाटील यांनी पुन्हा एकदा संघर्ष तीव्र केला आहे. “मी परत येईन की नाही माहीत नाही,” असे भावनिक उद्गार काढत त्यांनी मराठा समाजाला शांततामय मार्गाने गावागावातून पाठिंबा देण्याचे आवाहन केले आहे. जरांगे पाटील यांनी आपण एकटेच मुंबईच्या दिशेने निघालो असल्याचे जाहीर केले, सोबतच केवळ चार-पाच लोक आणि दोन गाड्या घेऊन प्रस्थान करणार असल्याचे सांगितले. यावेळी त्यांनी सरकारला आणि विशेषतः देवेंद्र फडणवीस यांना थेट आव्हान दिले.

“तुमच्यात दम असला तर मला आडवा,” असे म्हणत त्यांनी पोलिसांना मुंबईत परवानगीसाठी अर्ज देण्याचे आव्हान केले. मराठा समाजाने मात्र गावागावात सुरक्षित राहून शांततेत कॅन्डल मार्च किंवा रॅली काढून आंदोलनाला पाठिंबा द्यावा, असे आवाहन जरांगेंनी केले आहे. त्यांनी कोणत्याही सत्कार समारंभाचे आयोजन न करण्याचे आवाहन करत, रस्त्यात आशीर्वाद देण्यासाठी येणाऱ्यांना परवानगी दिली, पण मुंबईला न येण्याचे सांगितले. समाजाने इंचभरही आपली प्रतिष्ठा गमावू नये, असा त्यांचा निर्धार आहे.