मनोज जरांगे पाटील मुंबईकडे निघाले; आंदोलकांचीही मोठी गर्दी, पाहा ड्रोन दृश्य…

मराठा आरक्षणाच्या मागणीसाठी आंदोलनकर्ते मनोज जरांगे पाटील अखेर मुंबईकडे रवाना झाले आहेत. पोलिसांकडून परवानगी नाकारण्यात आली असतानाही, जरांगे यांनी मुंबईला जाण्याचा आपला निर्धार कायम ठेवला. ते अंतरवाली सराटीतून मुंबईच्या दिशेने निघाले असून, त्यांच्या या प्रवासाची दृष्ये समोर आली आहेत. मनोज जरांगे पाटील यांनी निघण्यापूर्वी प्रतिक्रिया देताना, “मी एकटा मुंबईला जातोय,” असे म्हटले होते. तसेच, “मला गोळ्या घालून मारायचे षडयंत्र” असल्याचा गंभीर आरोपही त्यांनी केला आहे. ते सुमारे पाच दिवसांत मुंबईमध्ये पोहोचतील असा अंदाज आहे.

दोन दिवसांपूर्वीच त्यांनी १५ सप्टेंबर रोजी अंतरवाली सराटीतून मुंबईला जाण्याची घोषणा केली होती. त्यावेळी पोलिसांनी परवानगी नाकारली असली तरी, जरांगे पाटील यांनी एकटा जाणारच अशी ठाम भूमिका घेतली होती. मराठा समाजाला आरक्षण मिळावे या मागणीसाठी ते मुंबईकडे निघाले आहेत, ज्यामुळे महाराष्ट्राच्या राजकारणात पुन्हा एकदा हलचल वाढली आहे.