Manoj Jarange Patil : दिल्लीचा लाल्या अन् लहान वयातील बाल्या, जरांगे अन् वडेट्टीवारांमध्ये जुंपली, बड्या नेत्यावर निशाणा

मनोज जरांगे पाटील यांनी राहुल गांधींवर दिल्लीचा लाल्या असा उपरोधिक उल्लेख करत गंभीर आरोप केले आहेत. दिल्लीचा लाल्या मराठ्यांना लक्ष्य करायला सांगतो, असे जरांगे पाटील यांनी म्हटले आहे. काँग्रेस नेते विजय वडेट्टीवार यांच्या माध्यमातून मराठा समाजाला लक्ष्य केले जात असल्याचा दावाही जरांगे पाटील यांनी केला. ओबीसीच्या नावाखाली वडेट्टीवार राजकारणात स्थिरावण्याचा प्रयत्न करत आहेत, असे त्यांचे म्हणणे आहे.

तर या टीकेला प्रत्युत्तर देताना विजय वडेट्टीवार यांनी मनोज जरांगे पाटील यांना लहान वयातील बाल्या संबोधले. “जशी जरांगेंची बुद्धी, तशीच त्यांची वृत्ती आहे,” असे वडेट्टीवार यांनी म्हटले. जरांगेंच्या बालिश बुद्धीमुळेच त्यांना असे शब्द सुचतात, असा टोलाही वडेट्टीवार यांनी लगावला. जरांगे पाटील यांच्या या विधानांमुळे त्वरित राजकीय परिणाम दिसू लागले असून, विदर्भातून मराठे आणि कुणबी आरक्षणाच्या विरोधात बोलणाऱ्यांना यापुढे झटका दाखवतील, असे संदेश येत असल्याचे जरांगे पाटील यांनी म्हटले आहे. हा काँग्रेसचा मोर्चा असून, काँग्रेसमध्ये आपली जागा शोधण्यासाठी वडेट्टीवार मराठ्यांचा रोष ओढवून घेत आहेत, असेही जरांगे पाटील यांनी नमूद केले.