Maratha Reservation | जरांगे पाटलांच्या समर्थनार्थ मराठा समाजाचा एल्गार! परळी बंद, हिंगोली-नांदेडमध्ये रास्ता रोको

मनोज जरांगे पाटील यांच्या मराठा आरक्षणाच्या मागणीसाठी सुरू असलेल्या उपोषणाला राज्यभरातून मोठा पाठिंबा मिळत आहे. याच पाठिंब्याचा एक भाग म्हणून सकल मराठा समाजाने आज परळी बंदचे आवाहन केले आहे. जरांगे पाटील यांच्या समर्थनार्थ मराठा समाज एकवटला असून, त्यांच्या मागण्या मान्य होईपर्यंत आंदोलन सुरू ठेवण्याचा निर्धार केला आहे.

आज केवळ परळी बंदच नव्हे, तर मराठा आरक्षणाच्या मागणीसाठी विविध जिल्ह्यांमध्ये आंदोलने पुकारण्यात आली आहेत. हिंगोलीमध्ये आज रास्ता रोको आंदोलन करण्यात येणार आहे. तर, नांदेड जिल्ह्यातही आज रास्ता रोको आणि जिल्हा बंदची हाक देण्यात आली आहे. नांदेडमधील निळा रोड आणि पिंपळगाव महादेव या ठिकाणी रास्ता रोको होणार असल्याचे कळते.

विशेष म्हणजे, मराठा समाजाने २८८ आमदारांची प्रतीकात्मक तिरडी यात्रा काढून जरांगे पाटील यांच्या उपोषणाला पाठिंबा देणार असल्याचे सांगितले आहे. हा एक प्रकारे सरकारला दिलेला इशारा मानला जात आहे. जर मराठा समाजाच्या मागण्या मान्य झाल्या नाहीत, तर यापुढे आणखी तीव्र आंदोलने करण्यात येतील, असा इशारा मराठा आंदोलकांनी दिला आहे. त्यामुळे मराठा आरक्षणाचा प्रश्न पुन्हा एकदा ऐरणीवर आला आहे.