‘उत्तर सभा म्हणजे स्वतःवरती अंत्यसंस्कार’; अजित पवार यांच्या बीड येथील सभेला राऊत यांची खोचक टीका
ठाकरे गटाचे प्रमुख उद्धव ठाकरे यांची आज हिंगोलीत आणि उपमुख्यमंत्री अजित पवार यांची उत्तर सभा बीड येथे होणार आहे. तर राज ठाकरे यांची देखील कोकणात सभा होणार. यादरम्यान दोन ठाकरे आणि अजित पवार काय बोलणार याकडे राज्याचे लक्ष लागलेलं आहे.
मुंबई 27 ऑगस्ट 2023 | राष्ट्रवादीत गेल्या महिन्यात उभी फूट पडली आणि दोन गट तयार झाले. अजित पवार यांच्या गटात अनेक नेत्यांनी प्रवेश केला. तर शरद पवार यांच्याकडे आता काहीच नेते सोबत आहेत. यावरून शरद पवार आणि त्यांच्या गटाकडून बंडखोरांच्या मतदारसंघात सभा घेतल्या जात आहेत. बीड येथे देखील शरद पवार यांनी 17 ऑगस्टला सभा घेत जोरदार टीका केली होती. त्या टीकेला आज अजित पवार उत्तर देणार आहेत. उपमुख्यमंत्री अजित पवार यांची येथे उत्तर सभा होणार आहे. त्याच्याआधी त्यांच्या उत्तर सभेवर ठाकरे गटाचे खासदार संजय राऊत यांनी जोरदार टीकास्त्र सोडलं आहे.
राऊत यांनी अजित पवार यांच्यावर जोरदार निशाणा साधताना अजित पवारांच्या उत्तरसभेला काहीही महत्व नसल्याचं म्हटलं आहे. तर अजित पवारांची उत्तरसभा म्हणजे स्वत:वरचे अंत्यसंस्कार आणि उत्तरक्रिया असल्याचा टोला त्यांनी लगावला आहे. तसेच त्यांच्या या उत्तर सभ्यांना कोण विचारत नाही अशी देखील टीका त्यांनी केली आहे.
