Rohit Pawar : भीमनवारांनी राजीनामा दिला? रोहित पवारांच्या दाव्यानं खळबळ, नेमकं सत्य काय?

पुण्यात एमपीएससीच्या विद्यार्थ्यांचे गेल्या पाच दिवसांपासून सुरू असलेल्या आंदोलनादरम्यान, एमपीएससी अध्यक्ष भीमनवार यांच्या राजीनाम्यावरून मोठे राजकीय नाट्य घडले आहे. राष्ट्रवादी काँग्रेसचे नेते रोहित पवार यांनी दावा केला आहे की, एमपीएससी अध्यक्ष भीमनवार यांनी रविवारी सायंकाळी मुख्यमंत्र्यांकडे आपला राजीनामा सोपवला आहे. भीमनवार यांच्या राजीनाम्याची मागणी हे आंदोलन करत आहे.

मात्र, उपमुख्यमंत्री देवेंद्र फडणवीस यांनी रोहित पवारांचा हा दावा तातडीने फेटाळून लावला. त्यांनी स्पष्ट केले की, एमपीएससी अध्यक्षांचा राजीनामा स्वीकारणे हे राज्य सरकारच्या हातात नाही.

याच पार्श्वभूमीवर, भाजपचे प्रवक्ते नवनाथ बन यांनी रोहित पवारांवर जोरदार टीका केली आहे. बन यांनी पवारांचा दावा “अफवा” असल्याचे म्हटले असून, त्यांना संविधानाचा अभ्यास करण्याचा सल्ला दिला. एमपीएससी अध्यक्षांच्या राजीनाम्यासंबंधीच्या प्रक्रियेवर बोलताना बन यांनी, तो राजीनामा राज्यपालांकडे देणे महत्त्वाचे असल्याचे नमूद केले. या घडामोडींमुळे एमपीएससीच्या मुद्द्यावरून राज्यात राजकीय संघर्ष अधिक तीव्र झाला आहे.