MPSC Protest : MPSC आंदोलनाचा आठवा दिवस अन् पोलिसांचा मोठा इशारा; आंदोलनस्थळ रिकामं करण्याच्या दिल्या सूचना, मात्र रुपाली पाटील म्हणाल्या…

पुण्यात MPSCच्या विद्यार्थ्यांचे आंदोलन सुरू असून, आज आंदोलनाचा आठवा दिवस आहे. या पार्श्वभूमीवर पुणे पोलिसांकडून आंदोलन स्थळ रिकामे करण्याच्या सूचना देण्यात आल्या आहेत. आंदोलन रस्त्यावर सुरू असल्यामुळे पुणेकरांना त्याचा त्रास होत असल्याची याचिका हायकोर्टात दाखल करण्यात आली होती. त्यामुळे कोर्टाच्या निर्देशानुसार पोलिसांनी ही कारवाई सुरू केली आहे.

आमदार रोहित पवार यांच्यासह अनेक विद्यार्थी या ठिकाणी एकवटलेले आहेत. राष्ट्रवादी अजित पवार गटातील नेत्या रुपाली पाटील यांनीही विद्यार्थ्यांच्या बचावासाठी पुढाकार घेतला असून, तुम्हाला कोणीही उठवू शकत नाही, अशी भूमिका त्यांनी घेतली आहे. पोलिसांनी आंदोलकांना कोणत्याही प्रकारचा जमाव जमवू नये, अन्यथा कायदेशीर कारवाई केली जाईल, असा स्पष्ट इशारा दिला आहे. पोलिसांच्या सीसीटीव्ही व्हॅनमधूनही या सूचना सातत्याने दिल्या जात आहेत. सार्वजनिक वाहतूक आणि शांततेचा भंग होऊ नये, यासाठी ही कार्यवाही केली जात असल्याचे पोलिसांकडून सांगण्यात आले आहे.