Mumbai Local Mega Block : मुंबईतील तिन्ही रेल्वे मार्गांवर आज रात्रीच मेगाब्लॉक, ‘या’ मार्गावर लोकल फेऱ्या रद्द

मुंबईतील रेल्वे प्रवाशांसाठी महत्त्वाची बातमी आहे. आज रात्री मुंबई लोकलच्या तिन्ही रेल्वे मार्गांवर मेगाब्लॉक जाहीर करण्यात आला आहे. विशेषतः मध्य आणि पश्चिम रेल्वेच्या मुख्य मार्गांवर याचा परिणाम होणार आहे. आवश्यक तांत्रिक कामांसाठी हा मेगाब्लॉक घेतला जात आहे, ज्यामुळे रेल्वे सेवांवर परिणाम होणार आहे. मध्य रेल्वे मार्गावर भायखळा स्थानकाजवळ काही तांत्रिक कामे केली जाणार आहेत. या कामांसाठी विशेष ट्रॅफिक ब्लॉकची घोषणा करण्यात आली आहे.

त्याचबरोबर, पश्चिम रेल्वे मार्गावर माहीम ते सांताक्रुझ स्थानकांदरम्यान सुमारे साडेतीन तासांचा जम्बो ब्लॉक असेल. या मेगाब्लॉकमुळे प्रवाशांना काही अडचणींचा सामना करावा लागू शकतो. रेल्वे प्रशासनाने दिलेल्या माहितीनुसार, या दोन्ही मार्गांवरील काही लोकल आणि लांब पल्ल्याच्या रेल्वे फेऱ्या रद्द करण्यात आल्या आहेत. तसेच, काही रेल्वे गाड्यांच्या वेळापत्रकात आणि मार्गांमध्ये बदल करण्यात आले आहेत. प्रवाशांनी प्रवासाला निघण्यापूर्वी रेल्वेच्या अधिकृत घोषणा तपासाव्यात आणि त्यानुसार आपल्या प्रवासाचे नियोजन करावे, असे आवाहन करण्यात आले आहे.