महाराष्ट्र हिरवा करण्याची कुणाची हिंम्मत नाही; मुरलीधर मोहोळ स्पष्टच बोलले

मुरलीधर मोहोळ यांनी प्रजासत्ताक दिनाच्या पार्श्वभूमीवर पुण्यातील श्रीमंत दगडूशेठ हलवाई गणपती ट्रस्ट आणि खडकी ॲम्युनिशन फॅक्टरी यांच्या संयुक्त विद्यमाने आयोजित स्वदेशी शस्त्र प्रदर्शनाचे उद्घाटन केले. भारतीय सैन्यदलात वापरल्या जाणाऱ्या शस्त्रास्त्रांची माहिती पुणेकरांना मिळावी, हा या प्रदर्शनाचा उद्देश असल्याचे त्यांनी सांगितले.

पुणे महापौर निवडणुकीच्या निकालावर बोलताना मोहोळ यांनी भाजपला मिळालेल्या एकहाती सत्तेवर समाधान व्यक्त केले. महापौर पदासाठी अनेक इच्छूक असले तरी, पक्षश्रेष्ठी निष्ठेचा, क्षमतेचा आणि अनुभवाचा विचार करून निर्णय घेतील, असे त्यांनी नमूद केले. भाजपवर होणारे भ्रष्टाचाराचे आरोप त्यांनी फेटाळून लावले आणि निकाल स्पष्ट झाल्यानंतर आता रडणे बंद करा असे प्रतिपादन केले.

महाराष्ट्र हिरवा करू या एमआयएमच्या मेळाव्यातील वक्तव्याला त्यांनी तीव्र शब्दांत विरोध केला. “महाराष्ट्र हिरवा करण्याची कोणाचीही हिंमत नाही,” असे ठामपणे सांगत, हिंदुत्वाची व्यापक व्याख्या असल्याचे स्पष्ट केले. असे म्हणण्याचे धाडस करणाऱ्यांना त्यांच्या भाषेत उत्तर दिले जाईल, असा इशाराही त्यांनी दिला. आगामी जिल्हा परिषद आणि पंचायत समिती निवडणुकांमध्येही भाजपला मोठे यश मिळेल आणि वर्चस्व राहील, असा विश्वास मोहोळ यांनी व्यक्त केला.