मविआ नेत्यांसह राज ठाकरे निवडणूक आयोगात जाणार, निवडणुका घोषित होण्यापूर्वी आयुक्तांना भेटणार!

महाराष्ट्रातील स्थानिक स्वराज्य संस्थांच्या आगामी निवडणुकांपूर्वी, महाविकास आघाडीच्या नेत्यांसह महाराष्ट्र नवनिर्माण सेनेचे अध्यक्ष राज ठाकरे हे निवडणूक आयोगाकडे जाणार आहेत. १४ तारखेला दुपारी १२:३० वाजता राज्याचे मुख्य निवडणूक अधिकारी एस. चोकलिंगम यांची भेट घेण्यासाठी एक सर्वपक्षीय शिष्टमंडळ त्यांच्याकडे जाईल. या शिष्टमंडळात शरद पवार, उद्धव ठाकरे, प्रदेश काँग्रेसचे अध्यक्ष हर्षवर्धन सकपाळ आणि राज ठाकरे यांचा समावेश असेल.

विधानसभा निवडणुकीत मतदार याद्यांमध्ये घोळ झाल्याचा आरोप महाविकास आघाडीसह राज ठाकरे यांनीही निवडणूक आयोगावर केला होता. त्यामुळे मतदार याद्यांसह पारदर्शक निवडणुका सुनिश्चित करण्याच्या मागणीसाठी हे नेते एकत्र येत आहेत. संजय राऊत यांनी मुख्यमंत्री आणि दोन्ही उपमुख्यमंत्र्यांनाही लोकशाही वाचवण्यासाठी एकत्र येण्याचे निमंत्रण दिले आहे. ठाकरे बंधूंमधील युतीच्या चर्चांच्या पार्श्वभूमीवर राज ठाकरे यांची मविआ नेत्यांसोबतची ही भेट राजकीय वर्तुळात चर्चेचा विषय बनली आहे