Sanjay Raut : मनसे प्रवेशावरून मविआत ऑल इज नॉट वेल? राऊतांकडून सपकाळांचीच दिल्लीत तक्रार?

मनसेच्या महाविकास आघाडीतील संभाव्य समावेशावरून सध्या राजकीय वर्तुळात चर्चा सुरू आहे. महाराष्ट्र नवनिर्माण सेनेला महाविकास आघाडीत घेण्यास काँग्रेसचे प्रदेशाध्यक्ष हर्षवर्धन सपकाळ यांचा विरोध असल्याने, संजय राऊत यांनी थेट काँग्रेस हायकमांडकडे सपकाळ यांच्या विरोधात तक्रार केल्याचे वृत्त होते.

सूत्रांनी दिलेल्या माहितीनुसार, राऊत यांनी सपकाळ यांच्या विरोधात पत्र लिहिले होते. मात्र, काँग्रेस हायकमांडने सपकाळ यांना पाठिंबा दर्शवत ठाकरे गटाच्या शिवसेनेवर नाराजी व्यक्त केली आहे. विशेष म्हणजे, ऑन कॅमेरा संजय राऊत आणि हर्षवर्धन सपकाळ दोघांनीही अशी कोणतीही तक्रार झाल्याचे नाकारले आहे.

आघाडीच्या अनुषंगाने मनसेसोबत कोणताही प्रस्ताव किंवा चर्चा सुरू नसून, सपकाळ हे महाविकास आघाडीतील आमचे उत्तम मित्र असल्याचे राऊत यांनी म्हटले आहे. काँग्रेसचे मत असे आहे की, राज ठाकरेंना सोबत घेतल्यास विशेषतः बिहारसारख्या निवडणुकांमध्ये पक्षाला फटका बसू शकतो. त्यामुळे मनसेला महाविकास आघाडीत घेण्यास सध्या काँग्रेस अनुकूल नसल्याचे स्पष्ट होते.