Sanjay Raut Press | एक जागा, तीन पक्ष; राज्यसभा उमेदवारीवर महाविकास आघाडीत खलबतं

राज्यसभा निवडणुकीच्या पार्श्वभूमीवर राज्यातील राजकीय वातावरण चांगलेच तापले असून महाविकास आघाडीत एका जागेसाठी उमेदवारीवरून जोरदार हालचाली सुरू आहेत. या चर्चांना आता शिवसेना ठाकरे गटाचे नेते संजय राऊत यांनी दुजोरा दिला आहे.
माध्यमांशी बोलताना राऊत म्हणाले, “महाविकास आघाडी हा तीन तिघाडा आहे, पण काम बिघाडा नाही. महायुतीतही तीन चाकी रिक्षा आहे. अशा निवडणुकांमध्ये या प्रकारच्या चर्चा होत असतात. एक जागा आहे आणि त्या एका जागेसाठी तिन्ही पक्षांमध्ये सातत्याने चर्चा सुरू आहे. शेवटच्या मिनिटांपर्यंत ती सुरू राहू शकते.” उमेदवारीबाबत बोलताना राऊत म्हणाले की काँग्रेसमधून कोण इच्छुक आहे, याची त्यांना माहिती नाही. राष्ट्रवादी काँग्रेसमधून शरद पवार इच्छुक असल्याची चर्चा आहे. शिवसेना ठाकरे गटाकडून प्रियांका चतुर्वेदी यांचा कार्यकाळ संपत असून पक्षातील राजन विचारे आणि विनायक राऊत हे इच्छुक आहेत. “इच्छा व्यक्त करण्यास हरकत नाही, मात्र अंतिम निर्णय पक्ष आणि पक्षप्रमुख घेतात,” असे त्यांनी स्पष्ट केले.
यासंदर्भात उद्धव ठाकरे आणि जयंत पाटील यांच्यात नुकतीच चर्चा झाल्याची माहितीही राऊत यांनी दिली. लवकरच उमेदवारीबाबत अंतिम निर्णय जाहीर होईल, असे ते म्हणाले. दरम्यान, शरद पवार एनडीएसोबत जाणार नाहीत, असा ठाम विश्वासही राऊत यांनी व्यक्त केला. “मी त्यांना इतकी वर्षे ओळखतो. ते कधीही एनडीएसोबत जाणार नाहीत,” असे त्यांनी स्पष्टपणे सांगितले. राज्यसभा निवडणुकीच्या तोंडावर महाविकास आघाडीत चर्चांना वेग आला असून पुढील काही दिवसांत चित्र स्पष्ट होण्याची शक्यता आहे.