Gokul Gite | नाशिकचा तिढा कायम! फडणवीस-शिंदेंच्या चर्चेनंतरही गोकुळ गिते निवडणुकीवर ठाम

राज्यातील विधान परिषद निवडणुकीच्या पार्श्वभूमीवर राजकीय घडामोडींना वेग आला असून, अनेक ठिकाणी निवडणूक बिनविरोध करण्यासाठी प्रयत्न सुरू आहेत. महायुतीकडूनही काही जागांवर निवडणूक बिनविरोध करण्यासाठी प्रयत्न करण्यात आले होते. मात्र, नाशिक विधान परिषद मतदारसंघातील तिढा अद्याप कायम असून, तो सुटण्याची चिन्हे दिसत नाहीत.

नाशिकमधील अपक्ष उमेदवार गोकुळ गीते यांना निवडणुकीतून माघार घेण्यासाठी महायुतीच्या वरिष्ठ नेत्यांकडून प्रयत्न सुरू असल्याची चर्चा आहे. याच पार्श्वभूमीवर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी गोकुळ गीते यांच्याशी दूरध्वनीवरून चर्चा केल्याची माहिती समोर आली आहे.

माध्यमांशी संवाद साधताना गोकुळ गीते यांनी सांगितले की, मुख्यमंत्री देवेंद्र फडणवीस सध्या दिल्ली दौऱ्यावर असल्याने त्यांची प्रत्यक्ष भेट होणार नाही. मात्र, आज उपमुख्यमंत्री एकनाथ शिंदे यांची भेट घेणार असल्याचे त्यांनी स्पष्ट केले. तसेच, निवडणूक लढवण्याच्या आपल्या निर्णयावर आपण ठाम असल्याचेही गोकुळ गीते यांनी सांगितले. “आमचा प्रचार सुरू आहे आणि आम्ही निवडणुकीच्या तयारीत आहोत,” असेही ते म्हणाले. त्यामुळे नाशिक विधान परिषद निवडणुकीत अखेर काय घडामोडी घडतात आणि गोकुळ गीते आपली उमेदवारी कायम ठेवतात का, याकडे राजकीय वर्तुळाचे लक्ष लागले आहे.