नवनीत राणांचा थेट कृषीमंत्री भरणेंना फोन, आधी लाऊडस्पीकरवर ठेवला मग अचानक बंद का केला ??

अमरावती जिल्ह्यातील दुष्काळसदृश परिस्थिती आणि पावसाच्या कमतरतेवरून खासदार नवनीत राणा यांनी राज्याचे कृषीमंत्री दत्तात्रय भरणे यांच्याशी थेट फोनवरून संवाद साधला. अमरावती जिल्ह्यात ५९% पावसाची कमतरता असून, परिस्थिती अत्यंत बिकट असल्याचे राणा यांनी मंत्र्यांच्या निदर्शनास आणले. या संवादादरम्यान, नवनीत राणा यांनी प्रशासकीय पंचनामे न करता थेट सरसकट दुष्काळ जाहीर करण्याची मागणी केली.

अमरावती जिल्ह्यातील शेतकऱ्यांची सध्याची स्थिती पाहता, पंचनाम्यांची प्रक्रिया टाळून त्वरित उपाययोजना करणे गरजेचे असल्याचे त्यांनी नमूद केले. सुरुवातीला राणा यांनी हा फोन लाऊडस्पीकरवर ठेवला होता. राणा यांच्या मागणीवर कृषीमंत्री भरणे यांनी त्यांना मुख्यमंत्री साहेबांशी या विषयावर चर्चा करण्याचा सल्ला दिला. “होईल होईल, तुम्ही सीएम साहेबांशी बोलून घ्या,” असे भरणे म्हणाले. या प्रतिसादानंतर नवनीत राणा यांनी लाऊडस्पीकर बंद केल्याचे समोर आले. दुष्काळग्रस्त भागातील शेतकऱ्यांसाठी त्वरित दिलासा मिळवण्यासाठी हा संवाद महत्त्वाचा ठरला आहे.