Video : शरद पवार, शेकापचा ठाकरे बंधूंच्या मोर्चाला जाहीर पाठिंबा

ठाकरे बंधूंच्या गर्जना मोर्चाला विविध राजकीय पक्षांकडून पाठिंबा मिळत आहे. उद्या होणाऱ्या या मोर्चाला राष्ट्रवादी काँग्रेस आणि शेतकरी कामगार पक्षाने (शेकाप) आपला जाहीर पाठिंबा दर्शवला आहे. राष्ट्रवादी काँग्रेसचे अध्यक्ष शरद पवार यांनी स्पष्ट केले आहे की, त्यांच्या पक्षाचे कार्यकर्ते या मोर्चात मोठ्या संख्येने सहभागी होतील. पवारांनी या आंदोलनाला पूर्णपणे समर्थन देत, आपल्या पक्षाची उपस्थिती नोंदवली आहे.

याचबरोबर शेतकरी कामगार पक्षानेही ठाकरे बंधूंच्या मोर्चाला पूर्ण पाठिंबा दिला आहे. शेकापचे नेते जयंत पाटील यांनी दिलेल्या माहितीनुसार, पनवेल आणि रायगड जिल्ह्यातून सुमारे चार ते पाच हजार कार्यकर्ते या मोर्चात सामील होणार आहेत. उद्धव ठाकरे आणि राज ठाकरे यांनी जाहीर केलेल्या या मोर्चाला शेकापचा पूर्ण पाठिंबा असल्याचे पाटील यांनी सांगितले.

जयंत पाटील यांनी या निमित्ताने रायगड जिल्ह्यातील नागरिकांना आणि महाराष्ट्रातील शेतकरी कामगार पक्षाच्या सर्व कार्यकर्त्यांना या उद्याच्या मोर्चात जास्तीत जास्त संख्येने सहभागी होण्याचे आवाहन केले आहे. राजकीय वर्तुळातून या पाठिंब्यामुळे मोर्चाचे महत्त्व वाढले असून, यातून राजकीय एकजुटीचे चित्र समोर येत आहे.