Rohit Pawar : …हे म्हणजे गुंडाकडून प्रवचन ऐकणं! हा तर राजकीय जुगाड, रोहित पवारांचं सरकारवर टीकास्त्र

रोहित पवारांनी निधी वाटपाच्या मुद्द्यावरून राज्य सरकारवर जोरदार टीका केली आहे. विकास निधीच्या नावाखाली सरकारी तिजोरीतून मतांची खरेदी केली जात असल्याचा गंभीर आरोप त्यांनी केला. रोहित पवार यांच्या मते, मध्यमवर्गीय मराठी कंत्राटदारांचे ८० हजार कोटी रुपये थकीत असतानाही सरकारकडे ते देण्यासाठी निधी उपलब्ध नाही. मात्र, सत्ताधारी पक्षाच्या ५४ आमदारांना प्रत्येकी ५ कोटी रुपये देण्यासाठी सरकारकडे पैसे आहेत, असे त्यांनी निदर्शनास आणून दिले.

रोहित पवार यांनी म्हटले आहे की, स्थानिक स्वराज्य संस्थांच्या निवडणुकांमध्ये मतांची खरेदी करण्याकरिता हा राजकीय जुगाड असून, लोकशाहीची थट्टा आहे. हा प्रकार केवळ लोकशाहीचा अपमान करणारा नसून, समान न्याय आणि लोकशाहीचा सन्मान करण्याची अपेक्षा करणे म्हणजे गुंडाकडून सदवर्तनाचं प्रवचन ऐकण्यासारखं आहे, अशी उपरोधिक टीकाही त्यांनी केली. जात आणि धर्म यांवर आधारित भेदभाव करून निधीचे वाटप केले जात असल्याचा आरोपही त्यांनी केला. महाराष्ट्राच्या राजकारणात निधी वाटपावरून सत्ताधारी आणि विरोधकांमध्ये सुरू असलेल्या संघर्षाला या विधानामुळे अधिक धार आली आहे.