Bihar Election Results 2025 : विजय बिहारमध्ये, जल्लोष महाराष्ट्रात… चंद्रकांतदादांनी लाडू वाटले तर चव्हाणांनी वाजवला ढोल… ही झलक पाहाच

बिहार विधानसभा निवडणूक २०२५ मध्ये एनडीएने दणदणीत विजय मिळवत पुन्हा एकदा सत्तेवर येण्याचा मार्ग मोकळा केला आहे. पंतप्रधान नरेंद्र मोदींचा करिष्मा या निवडणुकीत प्रभावी ठरला असून, महाआघाडीचा सुपडा साफ झाला आहे. बिहारमध्ये भाजप सर्वात मोठा पक्ष म्हणून उदयास आला आहे, तर जनता दल (युनायटेड) दुसऱ्या क्रमांकावर आहे. निवडणुकीच्या निकालानुसार एनडीएला प्रचंड बहुमत मिळाले असून, महाआघाडी ५० जागांच्या आतमध्ये अडकली आहे. या निकालांनी महाराष्ट्रातील विधानसभा निकालांप्रमाणेच धक्कादायक चित्र निर्माण केले आहे.

बिहारमध्ये एनडीएला विजय मिळताच राज्यात एनडीएच्या कार्यकर्त्यांकडून आणि नेत्यांकडून विजयाचा जल्लोष साजरा करण्यात येत आहे. महाराष्ट्रातील भाजपचे प्रदेशाध्यक्ष रवींद्र चव्हाण यांच्यासह भाजपचे अनेक नेते भाजप कार्यालयात या विजयाचे जोरदार स्वागत करत आहेत. ढोल वाजवून आणि फटाके फोडून विजयाचा आनंद व्यक्त केला जात आहे. हा विजय पंतप्रधान मोदींच्या नेतृत्वावर आणि एनडीएच्या धोरणांवर बिहारच्या जनतेने विश्वास दर्शवल्याचे स्पष्ट करतो.