Maharashtra Local Body Election : कोकणात राणे बंधूंच्या लढतीत निलेश राणेंची सरशी तर रवींद्र चव्हाण यांना धक्का

कोकणातील स्थानिक स्वराज्य संस्था निवडणुकीच्या निकालांनी राजकीय वर्तुळात अनेक धक्कादायक निकाल समोर आणले आहेत. विशेषतः राणे बंधूंमधील राजकीय लढाईत निलेश राणेंनी सरशी केली, तर मंत्री नितेश राणे यांच्या उमेदवारांना पराभवाचा सामना करावा लागला. मालवण नगरपरिषदेच्या नगराध्यक्षपदी शिंदे सेनेच्या ममता वराडकर विजयी झाल्या. त्यांनी भाजपच्या शिल्पा खोत यांचा पराभव केला. हा विजय मालवणच्या जनतेचा आणि शिंदे शिवसेनेच्या कार्यकर्त्यांचा असल्याचे ममता वराडकर यांनी नमूद केले.

कणकवलीमध्येही नितेश राणे यांना मोठा धक्का बसला. निलेश राणेंचा पाठिंबा असलेले स्थानिक आघाडीचे उमेदवार संदेश पारकर यांनी विजय मिळवला, तर नितेश राणेंचा पाठिंबा असलेले भाजपचे उमेदवार समीर नलावडे पराभूत झाले. या निकालांमुळे भाजप प्रदेशाध्यक्ष रवींद्र चव्हाण यांना मोठा धक्का बसल्याचे मानले जात आहे. या निवडणुकांमध्ये अनेक ठिकाणी राज्याच्या काही प्रमुख नेत्यांना पराभवाचा सामना करावा लागला आहे.