Nitesh rane | हे अत्यंत संवेदनशील प्रकरण आहे, रोज बोलणं… दिशा सालियन प्रकरणावर नितेश राणेंचं ट्विट चर्चेत

दिशा सालियान प्रकरण हे अत्यंत संवेदनशील असून त्यावर रोज बोलणे योग्य नाही, असे नितेश राणे यांनी म्हटले आहे. या प्रकरणावर त्यांनी एक ट्विट केले असून, कायद्याला त्याचे काम करू द्यावे आणि न्यायव्यवस्थेवर विश्वास ठेवणे आवश्यक आहे असे त्यात नमूद केले आहे. प्रसिद्धी मिळवण्यासाठी मातोश्रीवर येऊन जे राजकारण केले जात आहे, तो अत्यंत “घाणेरडा प्रकार” असल्याचे त्यांनी म्हटले. सहा वर्षांपूर्वी घडलेल्या या दुर्दैवी अपघातावर सर्वांनी हळहळ व्यक्त केली होती. कोणताही मृत्यू संशयास्पद वाटल्यास त्याची चौकशी व्हायलाच पाहिजे, असेही राणे यांनी अधोरेखित केले.

मातोश्रीवर येऊन नाटक करणाऱ्यांमागे कोण आहे हे सर्वांना माहीत आहे, असे त्यांनी सांगितले. काही बेवडे, उरबडवे आणि त्यांना नियंत्रित करणारे एक नेपाळी कनेक्शन यातून हे सर्व घडत असल्याचे त्यांचे म्हणणे आहे. निलेश ओझा यांच्याकडे या प्रकरणाचे काही पुरावे असून, त्यानुसार ही केस पुन्हा उघडण्यात आली आहे. न्यायालयाने सीबीआयला ही केस पुन्हा उघडण्याचे निर्देश दिले असून, आता पुराव्यांच्या आधारावर न्यायालयीन प्रक्रिया पुढे जाईल, असे राणे यांनी स्पष्ट केले. ज्यांच्याकडे पुरावे आहेत, त्यांनी ते न्यायालयात सादर करावेत असे आवाहनही त्यांनी केले आहे.