Nitin Gadkari : …नाहीतर जेवढे वर चाललात तेवढेच खाली याल! BJP च्या मोठ्या प्रमाणातील इनकमिंगवरून कानमंत्र देत गडकरींचा खोचक टोला

केंद्रीय मंत्री नितीन गडकरी यांनी भाजप नेतृत्वाला, विशेषतः महाराष्ट्रातील राजकीय घडामोडींच्या पार्श्वभूमीवर, जुन्या आणि निष्ठावान कार्यकर्त्यांकडे लक्ष देण्याचा सल्ला दिला आहे. घर की मुर्गी दाल बराबर, बाहेरून आलेले सावजी चिकन या लोकप्रिय म्हणीचा वापर करत त्यांनी सध्या भाजपमध्ये मोठ्या प्रमाणात सुरू असलेल्या इनकमिंगवर सूचक भाष्य केले.

नितीन गडकरी म्हणाले की, चांगला माणूस घरातील असतो, पण त्याची किंमत डाळ भातासारखी कमी मानली जाते, तर बाहेरून आलेले सावजी चिकन अधिक आकर्षक वाटते. ते पुढे म्हणाले की, जर नेतृत्वाने जुन्या आणि प्रामाणिक कार्यकर्त्यांची कदर केली नाही, तर पक्ष सध्या ज्या वेगाने प्रगती करत आहे, त्याच वेगाने खाली येण्यास वेळ लागणार नाही. हा इशारा देताना त्यांनी सध्या नेतृत्व करणाऱ्या पदाधिकाऱ्यांना जुना कार्यकर्ता लक्षात ठेवा असा कानमंत्र दिला. त्यांचे हे विधान सध्याच्या राजकीय परिस्थिती, विशेषतः महाराष्ट्रातील सत्ताधारी महायुतीतील भाजपच्या भूमिकेत, महत्त्वाचे मानले जात आहे.