Prashant Ambi : कोणता जिहादी मदत करतो.., ‘शिवाजी कोण होता’ पुस्तकाच्या प्रकाशकाची पोलिसांकडून चौकशी; संजय गायकवाडांच्या आरोपांनंतर खळबळ

शिवाजी कोण होता या पुस्तकाचे प्रकाशक प्रशांत आंबी यांच्याविरोधात पोलीस चौकशी सुरू झाली आहे. आमदार संजय गायकवाड यांनी पोलीस महासंचालकांना दिलेल्या पत्रानुसार, आंबी यांना दहशतवादी संघटनांकडून पैशांचा पुरवठा होत असल्याचा आरोप केला आहे. याच आरोपांच्या अनुषंगाने पोलिसांनी आंबी यांची चौकशी सुरू केली आहे.

आंबी यांच्या म्हणण्यानुसार, त्यांना राजारामपुरी पोलीस स्टेशनमधून बोलावण्यात आले आणि त्यांच्यावर करण्यात आलेल्या आरोपांबाबत विचारणा करण्यात आली. पोलिसांनी त्यांना कोणता जिहादी मदत करतो, आरएनआय सर्टिफिकेट आहे का, प्रेसकडे लायसन्स आहे का, आयटीआर भरता का आणि मालमत्ता कुठे कुठे आहे असे प्रश्न विचारले. आंबी यांनी ही चौकशी बेकायदेशीर असल्याचे म्हटले आहे.

त्यांनी असाही दावा केला की, त्यांनी स्वतः आमदार संजय गायकवाड यांच्या विरोधात शिवीगाळ, जीवे मारण्याची धमकी आणि कुटुंबीयांना बलात्काराची धमकी दिल्याप्रकरणी तीन तक्रारी केल्या आहेत, मात्र त्यावर कोणतीही कारवाई झालेली नाही. याउलट, आपल्यावर खोटे आरोप करून दबाव आणला जात असल्याचे आंबी यांनी नमूद केले आहे.