Prashant Jagtap : प्रशांत जगताप काँग्रेसमध्ये येताच म्हणाले, माझी लढाई भाजप-संघाच्या विरोधात….

पुण्याचे माजी महापौर आणि राष्ट्रवादी काँग्रेसचे माजी शहर अध्यक्ष प्रशांत जगताप यांनी महाराष्ट्र प्रदेश काँग्रेस पक्षाचे अध्यक्ष हर्षवर्धन सपकाळ, विजय वडेट्टीवार यांच्यासह इतर प्रमुख नेत्यांच्या उपस्थितीत काँग्रेस पक्षात जाहीर प्रवेश केला. याप्रसंगी त्यांनी आपले विचार मांडताना काँग्रेसच्या वरिष्ठ नेत्यांचे आभार मानले. आपला पक्षप्रवेश हा केवळ पक्षबदल नसून, शिव, शाहू, फुले, आंबेडकर तसेच गांधी आणि नेहरू यांच्या विचारधारेला पुढे नेण्याच्या उद्देशाने असल्याचे जगताप यांनी स्पष्ट केले.

जगताप यांनी माध्यमांना आवाहन केले की, त्यांच्या पक्षप्रवेशाला त्यांच्या जुन्या पक्षप्रमुखांशी किंवा पक्षाशी झालेल्या वादाचे स्वरूप देऊ नये. त्यांची खरी लढाई भाजपच्या विरोधात आहे, संघाच्या विरोधात आहे, तसेच जातीय आणि धार्मिक आतंकवाद पसरवणाऱ्यांच्या विरोधात आहे. त्यांनी पुणे आणि महाराष्ट्रातील भ्रष्टाचारासाठी भाजपला जबाबदार धरले. लाखो कोटींच्या भ्रष्टाचाराची उड्डाणे भाजपने घेतल्याचा आरोप त्यांनी केला. पुण्यासारख्या शहरात गुन्हेगारी वाढली असून, केंद्रीय गृहमंत्री अमित शहा यांच्या अहवालानुसार पुणे गुन्हेगारीत देशात पहिल्या क्रमांकावर असल्याचा दावा जगताप यांनी केला.