कांद्याची आवक घटली; दरात मोठी वाढ झाल्याने शेतकऱ्यांना दिलासा

कृषी उत्पन्न बाजार समितीच्या चाकण उपबाजारात सध्या कांद्याची आवक घटल्याने दरात वाढ झाल्याचे चित्र आहे. एरवी दहा हजार पिशवी आवक असणाऱ्या या बाजारात आता केवळ पाच हजार पिशवी कांद्याची आवक होत आहे. एकरी २०० पिशवी उत्पादन मिळणारे शेतकरी सध्या केवळ २०-३० पिशवी उत्पादन घेत आहेत, अशी माहिती व्यापाऱ्यांनी दिली आहे.

या घटलेल्या आवकेमुळे कांद्याच्या बाजारभावात लक्षणीय वाढ झाली आहे. गेल्या आठवड्यात १० रुपये किलोने विकले जाणारे नवीन कांदे आता १५.५० रुपयांना मिळत आहेत. जुने कांदे, जे पूर्वी १२ रुपयांना खपत होते, ते आता २२ ते २५ रुपये किलोने विकले जात आहेत. पुढील आठवड्यात जुन्या कांद्याचे दर २५ ते ३० रुपये, तर नवीन कांद्याचे दर २० रुपयांच्या पुढे जाण्याची शक्यता व्यापाऱ्यांनी वर्तवली आहे. कांद्याची मागणी मोठ्या प्रमाणात असल्याने आवक घटल्याने दरांना तेजी मिळाली आहे. यामुळे शेतकरी वर्गात समाधानाचे वातावरण आहे. टीव्ही नाईन मराठीसाठी सुनील थिंगळे यांनी चाकण येथून हा अहवाल दिला आहे.