गणेश विसर्जन मिरवणुकीसाठी वाहतूक व्यवस्थेत मोठे बदल; जाणून घ्या सविस्तर माहिती

पुण्याला गणेशोत्सवाची एक वैभवशाली परंपरा लाभली आहे. ज्या उत्साहात गणेशोत्सव साजरा होतो, त्याच दिमाखात गणेश विसर्जन मिरवणूकही काढली जाते. यंदाच्या गणेश विसर्जनासाठी पुण्यामध्ये जय्यत तयारी सुरू आहे. उद्या गणेश विसर्जन मिरवणूक असल्याने, पुण्यातील मध्यवर्ती भागातील जवळपास 17 रस्ते वाहतुकीसाठी पूर्णपणे बंद ठेवण्यात येणार आहेत. प्रशासनाने दिलेल्या माहितीनुसार, आजपासूनच पुढील 48 तास जड वाहतुकीसाठी हे रस्ते बंद ठेवण्याचा निर्णय घेण्यात आला आहे. विसर्जन मिरवणूक निर्विघ्न पार पडावी यासाठी व्यापक बंदोबस्त ठेवण्यात आला आहे. यामध्ये जवळपास 10,000 पोलीस कर्मचारी आणि महानगरपालिकेचे 5,500 कर्मचारी तैनात असणार आहेत.

गणेश विसर्जन मिरवणुकीचा महत्त्वाचा टप्पा असलेल्या अलका टॉकीज चौकातही विशेष तयारी करण्यात आली आहे. दरवर्षी 30 ते 36 तास चालणाऱ्या या मिरवणुकीसाठी वाहतूक नियोजन अत्यंत महत्त्वाचे आहे. आज रात्री 11 वाजल्यापासून अनेक मुख्य रस्त्यांवर नो पार्किंग झोन लागू करण्यात येणार आहे. टिळक रोड, छत्रपती शिवाजी रस्ता, बाजीराव रस्ता आणि लक्ष्मी रोड यांसारखे प्रमुख रस्ते उद्यापासून वाहतुकीसाठी बंद राहतील. पुणेकर आणि भाविकांनी वाहतूक नियमांचे पालन करून प्रशासनाला सहकार्य करण्याचे आवाहन करण्यात आले आहे.