राज ठाकरे-राहुल गांधींमध्ये संवाद? संजय राऊतांच्या विधानाने राजकीय चर्चांना उधाण

शिवसेना (उद्धव बाळासाहेब ठाकरे) नेते संजय राऊत यांनी महाराष्ट्र आणि राष्ट्रीय राजकारणात मोठी खळबळ उडवून देणारे विधान केले आहे. राऊत यांच्या म्हणण्यानुसार, मनसे प्रमुख राज ठाकरे आणि काँग्रेस नेते राहुल गांधी यांच्यात संवाद सुरू आहे. सर्व विरोधी पक्ष एकमेकांशी बोलत असून, यात राज ठाकरे आणि राहुल गांधी यांचाही समावेश असल्याचे राऊत यांनी स्पष्ट केले. विरोधक एकमेकांशी संवाद का साधू नयेत, असा प्रश्न विचारत राऊत यांनी सध्या सुरू असलेल्या आंदोलनांना राहुल गांधींनी सुरू केलेल्या मोठ्या आंदोलनाचाच एक भाग असल्याचे म्हटले. हा संवादच असून, विरोधी पक्षांना एकत्र आणण्याचे प्रयत्न सुरू असल्याचे त्यांनी सूचित केले. या संवादाचे आणखी एक उदाहरण देताना राऊत यांनी पश्चिम बंगालच्या मुख्यमंत्री ममता बॅनर्जींचा उल्लेख केला.

कालपर्यंत आंदोलनात सहभागी नसलेल्या ममता बॅनर्जी आज विरोधी पक्षांच्या बैठकीला येत आहेत. पश्चिम बंगालमधील सध्याच्या राजकीय परिस्थितीमुळे त्यांना इंडिया ब्लॉकने आपल्या पाठीशी उभे राहावे असे वाटत आहे, आणि इंडिया ब्लॉक त्यांच्या पाठीशी असल्याचे राऊत यांनी सांगितले. यामुळे आगामी काळात विरोधी पक्षांचे ऐक्य अधिक बळकट होण्याची शक्यता वर्तवली जात आहे.