ते घायवळच्या मदतीने आमदार झाले! पडळकरांचे रोहित पवारांवर गंभीर आरोप

भाजप नेते गोपीचंद पडळकर यांनी आमदार रोहित पवार यांच्यावर गंभीर आरोप केले आहेत. पडळकर यांच्या म्हणण्यानुसार, रोहित पवारांच्या आजूबाजूला शेकडो गुन्हेगार आहेत. २०१९ च्या विधानसभा निवडणुकीत रोहित पवार हे निलेश घायवळ यांच्या मदतीने आमदार झाले असल्याचा दावाही पडळकरांनी केला. रोहित पवारांना महाराष्ट्राचे नेते होण्याची घाई झाली आहे, असा टोलाही पडळकरांनी लगावला.

सचिन घायवळ प्रकरणावरून रोहित पवार यांनी मुख्यमंत्र्यांवर टीका केल्यानंतर हा आरोप-प्रत्यारोपाचा कलगीतुरा सुरू झाला. पडळकर यांनी असाही दावा केला की, राम शिंदे यांनी दिलेल्या नावांमध्ये पवन राळेभात, सचिन घायवळ आणि अशोक खेडकर यांचा समावेश होता, जी नावे देवेंद्र फडणवीस यांनी एका प्रचारसभेत उच्चारली. जर सचिन घायवळचे नाव घेऊन देवेंद्र फडणवीस टीका करत असतील आणि आपला फोटो किंवा आईचा व्हिडिओ वापरून भांडवल करत असतील तर हे हास्यास्पद आहे, असे रोहित पवार यांनी म्हटले आहे. त्यांनी सीबीआय, ईडी आणि पोलिसांकडून सत्य बाहेर आणण्याचे आव्हानही दिले आहे. पडळकर यांनी निलेश घायवळवर पुण्यामध्ये खोटा मोका रोहित पवारांनी लावला असल्याचा आरोपही केला.