Ratnakar Gutte : जानकरांपासून अनजान? गुट्टेंपुढे कमळाचं निशाण? रासप आमदाराचा भाजपला पाठिंबा तर जानकर मविआच्या वाटेवर?

राष्ट्रीय समाज पक्षाचे (रासप) आमदार रत्नाकर गुट्टे यांनी भाजपसोबत राहण्याचे स्पष्ट संकेत दिले आहेत. जर रासपचे अध्यक्ष महादेव जानकर महायुतीसोबत आले नाहीत, तर आपण वेगळी राजकीय भूमिका घेऊ, असा इशारा गुट्टेंनी दिला आहे. परभणीच्या गंगाखेडचे आमदार गुट्टे यांनी देवेंद्र फडणवीस यांना आपला राजकीय गुरु संबोधत, त्यांच्या निर्णयाला आपण बांधील असल्याचे म्हटले. विकासाच्या राजकारणासाठी सत्तेसोबत राहणे आवश्यक असल्याचे गुट्टेंचे मत आहे.

यापूर्वीही रासपमधून राहुल कुल आणि गोपीचंद पडळकर यांसारखे नेते भाजपमध्ये सहभागी झाले आहेत. सध्या जानकर महाविकास आघाडीच्या नेत्यांच्या संपर्कात असल्याची चर्चा असून, ते भाजप नेत्यांवर टीका करत आहेत. अशा परिस्थितीत रासपमधील आमदारांचा भाजपला वाढत असलेला पाठिंबा पक्षासाठी आव्हान बनला आहे. गुट्टेंच्या या भूमिकेमुळे रासपमध्ये अंतर्गत फूट पडण्याची शक्यता निर्माण झाली आहे.