India Russia Summit : रशिया राष्ट्राध्यक्ष पुतीन यांना दिल्लीत ‘गार्ड ऑफ ऑनर’, राष्ट्रपती भवनात मोदींकडून स्वागत

रशियाचे राष्ट्राध्यक्ष व्लादिमीर पुतिन यांच्या भारत दौऱ्याला गार्ड ऑफ ऑनरने औपचारिक सुरुवात झाली. नवी दिल्लीतील राष्ट्रपती भवनात त्यांचे भव्य स्वागत करण्यात आले. यावेळी राष्ट्रपती द्रौपदी मुर्मू आणि पंतप्रधान नरेंद्र मोदी उपस्थित होते. पुतिन यांच्यासोबत रशियाचे सात मंत्रीही भारतात आले आहेत. भारत आणि रशिया यांच्यातील संबंध आठ दशकांहून अधिक जुने आणि विश्वासार्ह आहेत. या दौऱ्यात 23 वी वार्षिक शिखर परिषद आयोजित करण्यात आली आहे, जी दोन्ही देशांसाठी अत्यंत महत्त्वाची आहे.

सध्याच्या आंतरराष्ट्रीय घडामोडी, रशिया-युक्रेन युद्ध आणि अमेरिकेने भारतावर लादलेल्या टॅरिफच्या पार्श्वभूमीवर ही परिषद अनेक महत्त्वाच्या निर्णयांसाठी उपयुक्त ठरणार आहे. पुतिन यांना ट्राय सर्व्हिस गार्ड ऑफ ऑनर देण्यात आला, ज्यामध्ये तिन्ही सेनादलांच्या जवानांचा समावेश होता. त्यांच्या सन्मानार्थ रेड कार्पेट अंथरण्यात आले होते आणि 21 तोफांची सलामीही देण्यात आली. राष्ट्रपती भवनातील स्वागत समारंभानंतर पुतिन राजघाटावर महात्मा गांधींना आदरांजली वाहण्यासाठी रवाना झाले.