Sangli : 10 बाटल्या भरल्या अन् खळबळ उडाली; विहिरीतून पेट्रोलसदृश ज्वलनशील पदार्थ, व्हिडिओ बघाच

सांगली जिल्ह्यातील उमदी गावात एका विहिरीतून पुन्हा पेट्रोलसदृश पदार्थ बाहेर येत असल्याचा धक्कादायक प्रकार समोर आला आहे. स्थानिकांनी दिलेल्या माहितीनुसार, या विहिरीतून जवळपास एक लिटरच्या दहा बाटल्या भरून पेट्रोलसारखा पदार्थ काढण्यात आला आहे. या घटनेमुळे परिसरात एकच खळबळ उडाली असून, विहिरीला पाहण्यासाठी लोकांची गर्दी होत आहे.

शेतकऱ्यांनी या घटनेवर तीव्र चिंता व्यक्त केली आहे. विहिरीतून बाहेर येणारा हा ज्वलनशील पदार्थ अत्यंत धोकादायक असून, यामुळे कोणत्याही क्षणी मोठा अपघात घडण्याची शक्यता आहे. काही अज्ञान व्यक्तींकडून काडी किंवा बिडी ओढल्यास गंभीर दुर्घटना होऊ शकते, अशी भीती शेतकऱ्यांनी व्यक्त केली आहे. त्यामुळे, प्रशासनाने या घटनेची गांभीर्याने दखल घेऊन तात्काळ उपाययोजना करण्याची मागणी शेतकऱ्यांनी केली आहे.

विशेषतः, सार्वजनिक सुरक्षिततेच्या दृष्टिकोनातून विहिरीला तात्काळ संरक्षण आणि पोलीस बंदोबस्त पुरवावा, अशी मागणी उमदी येथील ग्रामस्थ आणि शेतकऱ्यांनी प्रशासनाकडे केली आहे. अशा ज्वलनशील पदार्थाच्या अचानक प्रकटीकरणामुळे संभाव्य धोके टाळण्यासाठी त्वरित कारवाई करणे आवश्यक असल्याचे त्यांचे म्हणणे आहे.