त्यांना पुन्हा मंत्री करणं सोपं नाही! संजय राऊतांनी स्पष्टच सांगितले

संजय राऊत यांनी पत्रकार परिषदेत महाराष्ट्रातील राजकीय परिस्थिती आणि गंभीर मुद्द्यांवर भाष्य केले. धनंजय मुंडे यांना पुन्हा मंत्रीपदी घेणे मुख्यमंत्री देवेंद्र फडणवीस यांच्यासाठी सोपे नाही, असे राऊत यांनी स्पष्ट केले. मुंडेंवर गंभीर आरोप असताना त्यांना परत मंत्रिमंडळात घेण्याचे पाप फडणवीस करणार नाहीत, अशी आशा त्यांनी व्यक्त केली.

राऊत यांनी महाराष्ट्रात वाढलेल्या ड्रग्स रॅकेटवरही चिंता व्यक्त केली. हे रॅकेट मंत्र्यांच्या घरापर्यंत पोहोचले असून, आता महाराष्ट्रातच ड्रग्सचे कारखाने उघडले जात असल्याचा आरोप त्यांनी केला. उपमुख्यमंत्र्यांच्या भावाचे नाव साताऱ्यात ड्रग्स प्रकरणात आल्याचेही त्यांनी नमूद केले. याशिवाय, माणिकराव कोकाटे यांच्या मंत्रीपदावरूनही त्यांनी भाष्य केले. सरकारमधील भ्रष्टाचार, मंत्री बेपत्ता होणे, गंभीर आरोप असूनही कारवाई न होणे यावर त्यांनी प्रश्नचिन्ह उपस्थित केले. देवेंद्र फडणवीस टप्प्याटप्प्याने गेम खेळतील आणि मिंध्यांवर शेवटचा घाव घालतील असा दावाही राऊत यांनी केला.