Sanjay Raut : नवी मुंबई विमानतळाला मोदींचे नाव देणार! भाजप-अदानींची बैठक अन्… राऊतांच्या दाव्यानं खळबळ

नवी मुंबई येथे एका आंतरराष्ट्रीय विमानतळाचे नुकतेच उद्घाटन आणि लोकार्पण पंतप्रधान नरेंद्र मोदी यांच्या हस्ते  करण्यात आले, मात्र त्याला अद्याप कोणतेही नाव देण्यात आलेले नाही. यासंदर्भात ठाकरे गटाचे नेते संजय राऊत यांनी खळबळजनक दावा केला आहे.  दि.बा. पाटील यांच्या नावाला भारतीय जनता पक्षाने विरोध दर्शवला आहे. तसेच, गौतम अदानी यांचाही दि.बा. पाटील यांच्या नावासाठी विरोध असल्याचे राऊतांकडून सांगण्यात आले आहे.

राऊत पुढे असेही म्हणाले,  या आंतरराष्ट्रीय विमानतळाला नरेंद्र मोदी आंतरराष्ट्रीय विमानतळ असे नाव देण्याबाबत भाजपांतर्गत चर्चा, सूचना आणि मागणी सुरू झाली आहे. गुजरातमधील अहमदाबाद येथील सरदार वल्लभभाई पटेल स्टेडियमचे नामांतर होऊन ते नरेंद्र मोदी स्टेडियम असे करण्यात आले, याचा दाखलाही या संदर्भात दिला जात आहे. गौतम अदानी यांच्या मागणीमुळे आणि भाजपमधील एकमतामुळे विमानतळाचे लोकार्पण दि.बा. पाटील यांच्या नावाशिवाय झाल्याचे सांगितले जात आहे. सध्या या विमानतळाला नरेंद्र मोदींचे नाव देण्यासाठी प्रयत्न सुरू आहेत.