संजय राऊतांचा सरकारवर हल्लाबोल, तरुणांच्या आंदोलनावर म्हणाले जंतर-मंतरचा पॅटर्न

संजय राऊत यांनी सरकारवर तीव्र शब्दांत टीका करताना, तरुणांना अंधभक्त बनवण्याचा कारखाना सरकारने सुरु केल्याचा आरोप केला आहे. या अंधभक्तीचा गांजा आणि चरस उतरवायचं काम आम्ही सगळ्यांनी सुरू केलेलं आहे, असे राऊत यांनी म्हटले. सरकारला विचार करणारे किंवा न्याय हक्कांसाठी, महाराष्ट्राच्या अस्मितेसाठी संघर्ष करणारे तरुण नको आहेत, असेही त्यांनी नमूद केले. राऊत यांनी पुण्यातील विद्यार्थी आंदोलनाचे विशेष महत्त्व अधोरेखित केले.

पुण्यामध्ये, या रस्त्यावर हजारोच्या संख्येनं गेल्या अनेक दिवसांपासून ही मुलं आंदोलनं करतायत. हे महाराष्ट्रातलं जंतर-मंतर आहे, असे त्यांनी म्हटले. या आंदोलनाच्या गर्जना देवेंद्र फडणवीस यांच्यापर्यंत पोहोचू द्याव्यात, असे आवाहन त्यांनी केले. त्यांच्यापर्यंत या गर्जना पोहोचल्या असल्या तरी, त्यांनी बहिरेपणाचे सोंग घेतले आहे, अशी टिप्पणी राऊत यांनी केली. जंतर-मंतरचा पॅटर्न असा आहे, घेतल्याशिवाय जात नाही, या शब्दांत त्यांनी आंदोलकांच्या निर्धारावर विश्वास व्यक्त केला.