Shiv Sena Symbol : मूळ पक्षाला डावलून फुटीर गटाला चिन्ह… धनुष्यबाणाच्या वादावर संजय राऊतांचा निवडणूक आयोगावर निशाणा, पुढे म्हणाले…

शिवसेना (उद्धव बाळासाहेब ठाकरे) पक्षाचे खासदार संजय राऊत यांनी महाराष्ट्रातील दुष्काळ, शेतकरी समस्या आणि राज्य सरकारच्या कार्यक्षमतेवर गंभीर प्रश्नचिन्ह उपस्थित केले आहे. महाराष्ट्राचे सरकार परावलंबी असून, दिल्लीतून मदतीची वाट पाहत असल्याचे त्यांचे म्हणणे आहे. कर्नाटकने दुष्काळ जाहीर केला असताना, महाराष्ट्राने अद्याप ते का केले नाही, असा सवाल त्यांनी विचारला.

शेतकऱ्यांना एकरी पन्नास हजार रुपये मदत आणि चारा छावण्यांची गरज असल्याचे राऊत यांनी नमूद केले. राज्य सरकारकडे शेतकऱ्यांच्या प्रश्नांवर आस्थेने विचार करणारे नेतृत्व नाही, अशी स्पष्ट भूमिका त्यांनी मांडली. एनडीआरएफच्या निकषांशिवाय मदत करण्याच्या सरकारच्या दाव्यावर त्यांनी शंका व्यक्त केली. कर्जमाफीचा कारभार भोंगळ असून, अनेक शेतकऱ्यांना याचा फायदा झालेला नाही, असे निरीक्षण त्यांनी नोंदवले.

यासोबतच, शिवसेनेच्या पक्षचिन्हाच्या वादावर बोलताना, निवडणूक आयोगाने मूळ पक्षाला डावलून फुटीर गटाला चिन्ह दिल्याचे सांगत, लोकशाहीच्या रक्षणासाठी निवडणूक आयोगाला धडा शिकवावा लागेल, असे म्हटले.