भाजपच्या पायाखालीची वाळु सरकलेय, आता सप्टेंबरपासून पडझड… संजय राऊतांचं अजब भाकित

शिवसेना (उद्धव बाळासाहेब ठाकरे) नेते संजय राऊत यांनी सप्टेंबर महिन्यानंतर महाराष्ट्रातील सरकारची पडझड सुरू होईल, असे भाकीत केले आहे. भाजपला डरपोक लोकांचा पक्ष संबोधत त्यांनी सत्तेचे कवचकुंडळ असेपर्यंतच त्यांची दादागिरी दिसेल, सत्ता गेल्यानंतर ९०% भाजप नेते बिळात जातील, अशी टीका केली. राहुल गांधींच्या पुणे दौऱ्यावरून भाजपने केलेल्या विरोधाला त्यांनी दहशतवाद म्हटले असून, राहुल गांधी देशाचे नेते असल्याचे प्रतिपादन केले.

राऊत यांनी वंदे मातरमच्या मुद्द्यावरून भाजपवर हल्ला चढवला. जंतर मंतरवर वंदे मातरम म्हणणाऱ्या मुलींवर पोलिसांनी लाठीमार केल्याची आठवण करून देत, भाजपने आता वंदे मातरमचा मुद्दा उपस्थित करणे ढोंग असल्याचे म्हटले. रोहित पवारांनी राहुल गांधींसाठी बॅनर लावल्याचे कौतुक करत, ते काँग्रेसमध्ये जातील या चर्चा फेटाळून लावल्या. पुणे पोलिसांनी काँग्रेस कार्यकर्त्यांवर गुन्हे दाखल केले, मात्र अखिल भारतीय विद्यार्थी परिषदेच्या (ABVP) कार्यकर्त्यांवर कारवाई न केल्याबद्दल त्यांनी प्रश्नचिन्ह उपस्थित केले. ही सूडबुद्धीची कारवाई असून, शिवसेनेच्या विशाखा राऊत यांचे नगरसेवक पद रद्द करणे हे चुकीचे असल्याचे राऊत म्हणाले.