सनसनाटी निर्माण करण्याचा केविलवाणा प्रयत्न! शंभूराज देसाईंचा अंधारेंना टोला

मुंबई महापालिका निवडणुकीच्या तोंडावर खासदार संजय राऊत यांनी राष्ट्रवादी काँग्रेसचे अध्यक्ष शरद पवार यांची मुंबईतील सिल्व्हर ओक निवासस्थानी भेट घेतली. सुमारे 20 ते 25 मिनिटे चाललेल्या या राजकीय भेटीत मुंबईसह अन्य स्थानिक स्वराज्य संस्थांच्या निवडणुकांमध्ये संभाव्य आघाडीवर चर्चा झाल्याची माहिती आहे. राष्ट्रवादी काँग्रेस (शरद पवार गट) ठाकरे गटासोबत आघाडी करण्यास अनुकूल असल्याचे संकेत मिळत आहेत.

दरम्यान, पालकमंत्री शंभूराज देसाई यांनी शिवसेनेच्या (उद्धव बाळासाहेब ठाकरे गट) प्रवक्त्या सुषमा अंधारेंनी केलेल्या आरोपांवर तीव्र प्रतिक्रिया दिली आहे. सातारा ड्रग्स प्रकरणामध्ये उपमुख्यमंत्री एकनाथ शिंदे आणि त्यांचे बंधू प्रकाश शिंदे यांच्यावर अंधारेंनी केलेल्या आरोपांना देसाईंनी सनसनाटी निर्माण करण्याचा केविलवाणा प्रयत्न असे संबोधले. त्यांनी स्पष्ट केले की, हे आरोप बिनबुडाचे असून निवडणुकांच्या पार्श्वभूमीवर ही प्रसिद्धी मिळवण्याची धडपड आहे. दोन वर्षांपूर्वीही अंधारेंनी अशाच प्रकारचे आरोप केले होते, ज्याविरोधात कायदेशीर कारवाई सुरू असल्याचे देसाईंनी नमूद केले.