म्हणजे मत विकत घेतल्याचं सिद्ध होतं! संजय शिरसाट यांचा मोठा दावा

राज्याच्या राजकारणात अनेक घडामोडी घडत आहेत. यामध्ये मतदारांच्या यादीवरून गंभीर आरोप, नेत्यांच्या दिल्ली दौऱ्यावरील चर्चा आणि स्थानिक स्तरावरील विविध प्रश्न अधोरेखित होत आहेत. छत्रपती संभाजीनगरात निवडणुकीपूर्वी मतदारांच्या नावांची यादी व्हायरल होत असल्याच्या प्रकारावर शिवसेना नेते संजय शिरसाट यांनी तीव्र आक्षेप घेतला आहे. ही यादी प्रसिद्ध होणे म्हणजे मत विकत घेतल्याचे सिद्ध होते, असे मत त्यांनी व्यक्त केले. पोलिसांनी या प्रकरणी सुमोटो गुन्हा दाखल करून सायबर सेलने तात्काळ तपास करावा, अशी मागणी शिरसाट यांनी केली. अशा प्रकारामुळे मतदार भयभीत होऊन मतदान करणार नाही, अशी चिंता त्यांनी व्यक्त केली.

दरम्यान, अजित पवार यांच्या सातत्यपूर्ण दिल्ली दौऱ्यांवरून पत्रकारांनी देवेंद्र फडणवीस आणि अजित पवार यांना प्रश्न विचारले. जोपर्यंत अजितदादा आमच्याच वरिष्ठांना भेटतात, तोपर्यंत आनंद असल्याचे मिश्किल उत्तर फडणवीस यांनी दिले. अजित पवारांनीही “जर तुम्ही दुसरीकडे भेटायला गेले, तर मला वेगळा विचार करावा लागेल,” असे म्हटले. कल्याण डोंबिवलीतील मारहाणीच्या घटनेचा पंकजा मुंडे यांनी निषेध केला. लोकशाहीच्या मार्गाने निवडणुका लढल्या पाहिजेत, असे त्यांनी म्हटले.