Chhatrapati Sambhajinagar | छत्रपती संभाजीनगरमधील कलाकेंद्रात मोठा राडा अन् तोडफोड, नेमकं काय घडलं?

छत्रपती संभाजीनगर जिल्ह्यातील पैठण तालुक्यातील धपटी दांडा परिसरातील कुलस्वामिनी कलाकेंद्रावर काल रात्री जोरदार राडा झाल्याची घटना समोर आली आहे. दोन गटांमध्ये झालेल्या वादातून ही घटना घडल्याची प्राथमिक माहिती आहे. मिळालेल्या माहितीनुसार, एका जमावाने कलाकेंद्रात घुसून मोठ्या प्रमाणावर तोडफोड केली. खुर्च्या फोडण्यात आल्या तसेच खोल्यांच्या काचा फोडण्यात आल्या. काही खोल्यांमधील साहित्याचीही नासधूस करण्यात आली आहे. गेल्या दोन वर्षांपासून हे कलाकेंद्र या ठिकाणी सुरू आहे. मात्र या कलाकेंद्रामुळे परिसरात गुन्हेगारी वाढल्याच्या तक्रारी स्थानिकांकडून केल्या जात असल्याचे सांगितले जात आहे. काल रात्री किरकोळ कारणावरून वाद झाला आणि त्याचे रूपांतर मोठ्या गोंधळात झाल्याची माहिती कलाकेंद्राच्या मालकाने दिली आहे. या घटनेनंतर परिसरात तणावाचे वातावरण असून पुढील तपास सुरू आहे.