Ambadas Danve : फडणवीस दानशूर राज्याचे कंजूस प्रमुख, कर्जमाफीवरून दानवेंची घणाघाती टीका

महाराष्ट्राच्या राजकारणात सध्या मुख्यमंत्री सहाय्यता निधीतील खर्चावरून आरोप-प्रत्यारोपांच्या फैरी झडताना दिसत आहेत. विधान परिषदेचे विरोधी पक्षनेते आणि ठाकरे गटातील नेते अंबादास दानवे यांनी मुख्यमंत्री सहाय्यता निधीसंदर्भात केलेल्या ट्वीटमध्ये, अतिवृष्टीग्रस्त शेतकऱ्यांसाठी लोकांनी ऑक्टोबर महिन्यात अब्जावधी रुपये मुख्यमंत्री सहाय्यता निधीमध्ये पाठवले, मात्र राज्याच्या प्रमुखांनी फक्त ७५ हजार रुपये खर्च केले, असे म्हटले. त्यांनी देवेंद्र फडणवीस यांना “दानशूर राज्याचे कंजूस प्रमुख” असे संबोधले आणि हा निधी सरकारला त्यांच्या उद्योजक मित्रांनी दिलेला “इलेक्शन फंड” वाटतो का, असा प्रश्न उपस्थित केला. यानंतर या आरोपांना मुख्यमंत्री कार्यालयाने (CMO) सविस्तर आकडेवारी सादर करत प्रत्युत्तर दिले आहे, तसेच चुकीची माहिती देणाऱ्यांवर कारवाईचा इशाराही दिला आहे.